நம் நாட்டின் எந்த ஊடகமாக இருந்தாலும் சரி அதில் நிச்சயம் சினிமா அதை விட்டால் ஜோதிடம் தான் பெரும்பாலும் நிரம்பியிருக்கும். ஜோதிடத்தால் நன்மையோ இல்லையோ கெடுதல் நிச்சயம் என்று தெரிந்தும் பெரும்பாலான படித்த மக்கள் கூட நம்புகிறார்கள். காரணம் ஜோதிடத்தை பக்தியோடு பின்னியதால் அதன் நம்பகத்தன்மையை கேள்வி கேட்கும் துணிவு பலருக்கும் இல்லை. இரண்டாவது எதிர்காலத்தை அறியும் மனித விருப்பமும் காரணம். ஜோதிடத்தை பற்றிய ஒரு் பாமரனின் பேட்டி இது. படித்தவர்களுக்கு பயன்படும்.
ஜோதிடம் எப்போது தோன்றியது?
அது ஆச்சுங்க .ரொம்ப காலமா இஸ்டரியெல்லாம் உண்டாவறதுக்கு முந்தியே சோசியம் இருக்குங்க. பெரும்பாலான மக்களுக்கு சுயமாய் யோசிக்கிற பழக்கம் கிடையாதுண்ணு எப்போ கொஞ்ச பேருக்கு தெரிஞ்சு போச்சோ அப்பவே சோசியத்தை உண்டாக்கிட்டானுங்க.
ஜோதிடம் எந்த அளவுக்கு செல்வாக்கு பெற்றுள்ளது?
பெரிய பெரிய மன்னருங்க அறிவாளிங்க கூட சோசியத்த நம்பியிருந்திருக்காங்க. ஏன் இப்ப கூட பெரியஅரசியல் வாதிகள் முதக்கொண்டு அன்னாடம் சோத்துக்கே வழியில்லாதவனும் சோசியத்த தானே நம்புறான் ? எலெக்சனில நிக்கிற பத்து பேரும் சோசியக்காரண்ட கேட்டுபுட்டு தான் டெப்பாசிட் கட்டுறான் . ஆனா ஒருத்தன் தான் செயிக்கிறான்.ஆனா சோசியக்காரன் மட்டும் எப்பவும் டெபாசிட் இழக்கிறதில்லை.
காலைல காப்பி குடிக்கிறதுக்கு முன்னே காலண்டரை பார்த்து அது பேதியாகுமா? வாந்தியாகுமான்னு? பலன் தெரிஞ்சுகிட்டுதான் குடிக்கிறான். எந்த பேப்பரை பிரிச்சாலும் எல்லா பக்கமும் சோசியமும் மூலையிலே துக்குனூண்டு செய்தியும் தான் இருக்குது. டிவியத் திறந்தா கடக ராசிக்காரர்களே இன்னைக்கு நீ காலி. தண்ணி லாரியிலே கண்டம் இருக்குண்ணு பீதிய கிளப்புராங்க.என்னென்னமோ கல் எல்லாம் விக்கிறாங்க வீடு கட்டுற செங்கல்ல விட சீப்பாத்தான் இருக்கு. பெரிசா கல் வச்ச மோதிரம் அரசியல் வாதிகளுக்கு நல்லதாம். எப்படியோ தலையில அம்மிக்கல்லை வச்சு மொளகாய் அரைக்காம இருந்ததா சரி.
ஒரு ரகசியம் சொல்றேன் .யாருகிட்டேயும் சொல்லாதீங்க.சோசியத்தை நம்பாதவனும் சோசியகாரனும் கொஞ்சூண்டுதான்.சோசியத்த கண்ண மூடி நம்புறவனும் அப்படி நம்புறவனை எப்படியெல்லாம் ஏமாத்தி காசு சம்பாதிகலாம்னு கணக்கு போடறவங்கதான் இந்த உலகத்தில மெஜாரிட்டி ஆளுங்க. ஆமா நீங்க எந்த கட்சி?
பல வகையான ஜோதிடம் இருக்கிறதே எது சரியானது?
ஒருத்தனை பத்தி இன்னொரு சோசியக்காரன் கிட்ட கேட்டா இவனது தான் சரி மற்றது பொய்யின்னுவான் மொத்தத்தில எல்லா சோசியக்காரங்க கிட்ட கேட்டு ஒரு முடிவுக்கு வந்தால் எல்லாம் பித்தலாட்டம்னு தெரியும்.
ஜோதிடம் விஞ்ஞானப் பூர்வமானது என்கிறார்களே?
அக்காங். .அப்படித்தான் இருந்துச்சு பண்டைய விஞ்ஞானிகள் தூர தர்சினி வச்சு வானத்தையும் கிரகங்களையும் ஆராய்ஞ்சு பருவ காலங்களை கணிச்சாங்க. விவசாயிகள் கூட மேகத்தயும் காத்தையும் வச்சு மழை வருமாண்னு யூகிச்சாங்க. வால் நட்சத்திர வரவு, கிரகணங்கள் எல்லாத்தையும் கணிச்சதுக்கு பேர் அறிவியல். அது தான் இன்னிக்கு வானதுக்குள்ளேயே போய் தேடும் வான சாஸ்திர இயலா வாளர்ந்து நிக்குது. விஞ்ஞானங்கிறதை கரெக்டா கட்டம் கட்டிப்புடலாம். எப்ப வேணாலும் யாரும் அதை நிரூபிச்சு இது இது இப்படிதான் ரிசல்ட் வருமின்னு துல்லியமா சொல்லிப்புடலாம்.
எப்போ சோசியக்காரங்க தூர தர்சினியை தூக்கி தூரப் போட்டு பூதக்கண்ணாடியை கையில் எடுத்து பிரிய தர்சினி பிரியமா இருப்பாளா? என சொல்லத்தொடங்கினானோ அப்பவே எல்லாரையும் ஏமாத்தத் துணிஞ்சிட்டான். ஆனா அதை ஒரு அறிவியல் மாதிரி பெயின்ட் அடிச்சு வச்சிருக்காய்ங்க. இந்த சோசியருங்க ஜாதகக்கட்டை தூக்கிட்டு போய் அகில உலக அறிவியல் மாநாடுகளில் போய் பிரிச்சு வைக்க வேண்டியது தானே. கட்டங்களை பிரிச்சு மேஞ்சு தீவிரவாதிங்க எங்கெல்லாம் பதுங்கி இருக்காங்க எங்கே எப்ப தாக்குவாங்கன்னு கண்டு பிடிச்சு கொடுத்தா எவ்வளவு உசுருகளைக் காப்பாத்தலாம்.
சுனாமி வந்த போதும் நிலநடுக்கம் வருவதையும் சொல்லாதேன்னு எந்த கிரகம் வந்து வாயைப் பொத்திச்சு. ஏதோ நாலு பேர் படிக்கிற துக்கடா சோசியப்புத்தகத்தில பத்து எழுதி ஒன்னுநடந்திச்சுன்னா ஆஹா ஒஹோ நா அப்பவே சொன்னேனில்லையா என சவுண்ட் விடுவார்கள். சொன்னது நடக்கமால் போனால் எவன் அந்த கேள்விய எடுத்துகிட்டு போறது. அப்படியே போனாலும் ஜோசியம் பிழைச்சதுக்கு ஆயிரம் காரணங்கள் வச்சிருப்பாங்க.
யாராவது ஒரு சோசியன் தன்னால் நிச்சயமாக எதிர்காலத்தை 100% சரியாக கணிக்க முடியுமின்னு நெனச்சா கீழே உள்ள முகவரியை தொடர்பு கொண்டு
10,00,000 US டாலர்கள் பரிசு பெறலாம் என ஓப்பனா கேட்டுகிட்டிருக்காங்க. முகவரி இதோ http:/www.randi.org. emai:jref@randi.org.
இன்னிய தேதிக்கு அந்த பணத்தை டச் பண்ண ஒலகத்தில ஒரு சோசியக்கரனுக்கும் தில் இல்லே.
விஞ்ஞானத்தில வெளஞ்ச கம்ப்யூட்டரையே ஜோசிய பதிவெழுதவும் அதில் கட்டம் போட்டு ஜோசியம் பாக்கவும் உபயோகிக்கிறதால ஜோசியத்தில் அறிவியல் இல்லாட்டியும் இன்னிக்கு ஜோசியர்கள் அறிவியலை யூஸ் பண்ணித்தான் அறியாமையை பரப்புறாங்க. பலன்களை எதுக்கும் ஒருமுறை கூகிளை கேட்டுட்டுதான் சொல்கிறார்கள். தொலைஞ்சு போன சைக்கிளை கூட மை போட்டு தேடுறவுங்களும் வெற்றிலையாக கூகிள் எர்த் தான் யூஸ் பண்றாங்களாம்.
சில ஜோதிடர்கள் செய்யும் தவறால் சோதிடம் பொய்யென்று அர்த்தமில்லை. சோதிடத்தை முறையாக கற்றவர்களால் எதையும் துல்லியமாக கணிக்க முடியுமாமே?
சோசியக்க்கரன விட தங்க மணிங்க தான் நம்ப மனசுல இருக்கிறத நேக்கா தெரிஞ்சுக்கிறாங்க. அது தான் எப்புடீன்னு புரியல!
எதிர்காலத்த துல்லியமாக கணிக்க ஒருத்தருக்கு முடிஞ்சா அவர்தான் இன்னிக்கு ஒலகத்தில பவர் புல்லு . சரித்திரம் பூரா விஞ்ஞானிகளும், மாவீரர்களும் , மகான்களும் , மாமேதகளும் சர்வாதிகாரிகளும் தான் இருந்திருக்காங்க. சோசியக்காரன் ஒருத்தன் இருந்திருக்கானா?
இன்னிக்கு வரைக்கும் மழை வருமா வராதாண்ணு தெரிஞ்சுக்க டீவி பொட்டியத்தான் பார்க்கிறோம். அட்லீஸ்ட் வானிலை அறிவிப்பளரான யாராவது சோசியக்காரன் இருக்கானா?. அஞ்சுக்கும் பத்துக்கும் கைநீட்டிகொண்டும், நம்மகிட்ட ஜோசியம் பார்க்க வர்ரவன் பணம் தருவனா மாட்டானா?
என்ற சந்தேகத்திலேயே பலன் சொல்லி மனசை குடைசலில் விட்டிற்றாங்க இல்லையா?
ஜோசியக்காரங்களும் ஆஸ்பத்திரிக்கு போறாங்க, ஹார்ட் அட்டாக்கில போறாங்க, கடங்காரங்கிட்டே மாட்டிக்கிறாங்க. எல்லா சோசியரும் என்ன தான் மஹான் மாதிரி பில்டப் கொடுத்தாலும் எல்லாம் செட்டப் தான். சாதாரண மனுசப்பயபுள்ள வாழ்க்கைதான் வாழ்ந்து அல்லாடுறாங்க.
ஜோதிடத்திற்கும் ஆன்மீகத்திற்கும் என்ன சம்பந்தம்?
யாரு சோசியக்காரனை தேடிப் போவான் ?தன்னம்பிக்க இழந்து வாழ்க்கையில் நொந்து நூடுல்ஸ் ஆகி போனவன் தான் போவான். தன் கஷ்டத்துக்கெல்லாம் காரணம் யாருன்னு ஜோசியனைக் கேட்பான். அவனுக்கென்ன தெரியும்? வேண்டாதவங்க தகடு வச்சதா சொல்வான். அரண்டவன் கண்ணுக்கு கண்டவனெல்லாம் பகை. ஏற்கனவே காப்பிப்பொடி கடன் தராததால பக்கத்து வீட்டுல கடுப்பு. இது வேற சேந்துச்சா அவன்தான் தகடு வச்ச எதிரின்னு தீர்மானம் பண்ணிக்குவான். இவனுக்கு தன்னம்பிக்கை குறைஞ்ச நிலையில் யார் எதை சொன்னாலும் கேள்வி கேட்காமல் நம்பி விடுவார்கள். இவங்கிட்ட ” எல்லாம் நல்லாத்தான் போய்க்கிட்டிருக்கு” என்று சொன்னால் ஜோசியன் பிழைப்பு நல்லாவா இருக்கும்? பக்கத்து வீட்டுக்காரன் மேலயோ சனி யின் மேலோ பாரத்தை போட்டு அதற்கு பரிகாரம் செய்ய சொல்வார்கள். இந்த பரிகாரத்தில் தான் சூட்சுமமாய் பணம் கறந்துடறாங்க. இதுக்கு தெய்வத்தை துணைக்கு கூப்பிட்டு பக்கத்தில வச்சிக்கிடுவாங்க. ஏன்னா ஒருவேளை வந்தவங்க கஷ்டம் தானாவே தீர்ந்திட்டா பரிகாரத்தால் தோஷம் நீங்கியது. இல்லாவிட்டால் பரிகாரத்தை சாமி ஏத்துக்கலைன்னு கூலா கடவுள் பெயரில் பழியை போட்டு விட்டு ஜோசியர் சமர்த்தாக தப்பிக்கலாம்.
ஜோசியம் ஆன்மீகமல்ல. ஏன்னா கடவுளே விதி்யை அமைச்சு அதை மீறுகிற சக்தியை மனிதனுக்கு கொடுக்க முட்டாளா? பரிகாரம் செய்வதால் தான் கடவுள் மனமிரங்கி விதியை மாற்றித்தருகிறான்னு சொன்னா அப்ப்டி இந்த மனுசப்பயபுள்ள ஜோசியம் பார்த்து பரிகாரம் தேடிக்கொள்வான் என முன்பே தெரிந்து பொய்யா ஏன் அப்படி ஒரு முட்டாள் தனமான விதியை கடவுள் அமைக்கிறான். இறைவனால் பரிகாரம் கிடைக்கும் என ஏன் சோசியன் முதல்லையே கண்டுபிடிக்கலே. எப்படியானாலும் ஜோதிடம் இறைவனை கொச்சைப் படுத்தத்தான் செய்யுது. சின்னப்புள்ள தனமால்ல இருக்கு
சில வேளை ஜோதிடத்தில் சரியாக பலன் சொல்லப்படுகிறதே?
சிலவேளை என்ன பல வேளையும் பலன்கள் சரியாகத்தான் இருக்கும். ஆனா அது எப்போதும் செயிச்சா தான் விஞ்ஞானம்.
பொதுவா ஜோசியப் பலன்கள் எலாஸ்டிக் ஜட்டி போல கொஞ்சம் அட்ஜஸ்ட் பண்ணி யாருக்கும் போட்டுக்கலாம்.
எல்லாருகிட்டயும் கலகலப்பா பழகும் சுபாவம் அப்படீன்னு ஒரு இடத்தில இருந்தா பிரெண்சுங்க கம்மி தான் வேறோரு இடத்தில இருக்கும் . நமக்கு தேவைப்பட்டதை எடுத்துகொள்ள வசதியாக இருக்கும் படி நேரெதிர் பலன்களை சாமர்த்தியமாக வாக்கியத்தில் பொதிஞ்சு வைத்திருப்பங்க.
ஒரு கருத்து சரியாக இருந்தால் ஆகா ஜாதகத்தில் அப்படியே இருக்கிறதே!என்ற ஆச்சரியம் அதன் நம்பிக்கையை வலுப்படுத்துகிறது. அதனால் அடுத்துள்ள கருத்து தவறாப்போச்சுன்னா அது தமக்கானது இல்லை என்று அதிகம் அலட்டிக்கொள்ளாமல் விட்டு விடுவோம்.
சோசியக்காரங்களுக்கு கொஞ்சம் சைக்காலஜியும் தெரியும் வர்ரவங்க முக பாவத்தை பார்த்தே,போட்டிருக்கிற சட்டை வந்திறங்குகின்ற வாகனம் எல்லாத்தையும் கணக்கிட்டு தான் பலன்களை அடுக்குவாங்க. பிடிச்ச விஷயத்தை பெரிசு படுத்தறதும், அதிகமாக நினைவில் வச்சுக்கிறதும் , சிலாகிப்பதும் தான் மனுச புத்தி. (பார்க்க : Forer effect)
உதாரணமாக என் ஜாதகத்தில் “பேரும் புகழும் பெறுவீர்கள் பெண்களால் அதிகம் விரும்பபடுவீர்கள் “என்று இருந்தது . எனக்கு திருப்தியாத்தான் இருந்துச்சு. என் தங்கமணி அதை படிக்கும் வரை அதில் எந்த பிரச்சனையும் எனக்கு முதலில் தெரியல. அப்புறம் வில்லங்கமாயிற்று. என் நிம்மதி போச்சு.
அப்புறம் எனக்கு கணிதத்துறையில் நாட்டமதிகமாம் .பலன் சொல்றான் .ஆனால் கணக்குன்னாலே எனக்கு அலர்ஜி.ஆனால் எனக்கு பிடித்த கணினியை தான் அது சொல்றதுன்னு தேத்திக்கிட்டேன்.
ஆனா பாட்டி ஜாதகத்துக்கு கல்யாண பலன் வந்த போது ப்பூ..பொழப்பு சிரிக்கிறது